Àwọn ọmọdé

Àwọn òbí ní ojúṣe láti máa kọ́ àwọn ọmọ wọn ní ìwà rere déédéé nípasẹ̀ ìgbésí ayé ojoojúmọ́ àti àpẹẹrẹ wọn. Ẹ̀kọ́ ìbẹ̀rẹ̀ àti ẹ̀kọ́ àfaápọn ń ran àwọn ọmọdé lọ́wọ́ láti kọ́ ìpìlẹ̀ ìwà tí ó fìdí múlẹ̀ tí yóò máa darí wọn títí wọn yóò fi dàgbà.

Àwọn òbí ní ojúṣe láti kọ́ àwọn ọmọ wọn ní ìlànà àti ìwà ayé tí ó wu Ọlọ́run

Kìkì i kí ẹ kíyèsára, kí ẹ sì ṣọ́ra a yín gidigidi kí ẹ má ba à gbàgbé àwọn ohun tí ojú yín ti rí, kí wọn má sì ṣe sá kúrò lóókan àyà yín níwọ̀n ìgbà tí ẹ sì wà láààyè. Ẹ máa fi wọ́n kọ́ àwọn ọmọ yín àti àwọn ọmọ wọn tí ń bọ̀ lẹ́yìn wọn. (Deuteronomi 4:9)
Àwọn àṣẹ tí mo fún un yín lónìí gbọdọ̀ máa wà lóókan àyà yín. Ẹ fi kọ́ àwọn ọmọ yín gidigidi. Bí ẹ bá jókòó nínú ilé, ẹ jíròrò nípa wọn, àti nígbà tí ẹ bá ń rìn ní ojú ọ̀nà, bí ẹ bá dùbúlẹ̀ àti nígbà tí ẹ bá dìde. (Deuteronomi 6:6-7)
Ẹ fi gbogbo ọ̀rọ̀ mi wọ̀nyí sí àyà a yín, àti ọkàn an yín, ẹ so wọ́n bí àmì sórí ọwọ́ yín, kí ẹ sì so wọ́n mọ́ iwájú orí yín. Ẹ máa fi wọ́n kọ́ àwọn ọmọ yín, ẹ máa sọ̀rọ̀ nípa wọn bí ẹ bá jókòó nínú ilé, àti ní ojú ọ̀nà bí ẹ bá ń rìn lọ, bí ẹ bá sùn àti bí ẹ bá jí. (Deuteronomi 11:18-19)
Tọ́ ọmọdé ní ọ̀nà tí yóò tọ̀: nígbà tí ó bá dàgbà, kì yóò kúrò nínú rẹ̀. (Òwe 22:6)